feature wisata budaya "Makam Girigondo"

Makam Girigondo

Makam Girigondo mapan wonten ing perbukitan Menoreh Dusun Girigondo Kaligintung kecamatan Temon, kabupaten Kulon Progo sedasa kilometer saking kutha Wates. Makam menika mliginipun kangge raja, kulawarga raja saha para sakabat-sakabat caket saking Pakualaman.

Makam menika dipunginakaken kangge nyarekaken tilaring KGPPA Pakualaman V wonten ing wulan September 1990. Perkawis menika saged dipunbuktekaken kanthi wontenipun prasasti ingkang wonten ing ngajengipun gapura. Kompleks pemakaman menika kaperang dados 6 teras, saha saben terasipun menika dipungayutaken kaliyan undhak-undhakan ingkang inggil sanget. Wonten ing teras sepisan minangka teras ingkang paling inggil menika dipunubengi kaliyan tembok saha pager wesi ingkang inggilipun 2,40 meter.

Teras sepisan ingkang ukuranipun 3,2 x 2,155 meter menika dipun-makam-aken kulawarga Pakualaman wiwit garwa, putra, saha putra mantunipun sedaya 32 makam. Teras kaping kalih manggen wonten ing sisih kidulipun teras sepisan, ingkang dipungayutaken kaliyan undhak-undhakan cacahipun wonten 21. Wonten ing teras kapin kalih menika wonten 8 makam. Teras kaping tiga menika taksih lahan kosong, wonten ing mriku namung wonten 2 makam. Teras kaping sekawan wonten 3 makam inggih menika makam sedherek tebih Pakualaman. Teras kaping gangsal menika taksih kosong. Wonten ing teras kaping enem menika kaperang malih dados kalih inggih menika sisih kilen saha sisih wetan. Sisih kilen wonten 2 makam,  saha sisih wetan menika wonten 7 makam. Bilih sampun minggah ngantos puncak pemakaman menika, para pengunjung saged ningali wit-witan ingkang endah sanget kanthi latar belakang samudra Indonesia.

Sejarahing Makam 

Wonten ing pemakaman Girigondo menika dipunwiwiti kanthi makam Pakualaman V ngantos Pakualaman VIII. Bilih Pakualaman I dumugi Pakualaman IV menika dipun-makam-aken wonten ing Kotagedhe, dados setunggal kaliyan komplek makam raja-raja Mataram. Perkawis menika amargi ing wekdal pamarintahanipun Pakualaman I ngantos Pakualaman IV dereng wonten utawi dereng gadhah makam khusus kangge kulawarga Pakualaman. Dados ing wekdal pamarintahanipun Pakualaman V lemah kangge kulawarga menika dipun-usahak-aken. 

Makam Girigondo menika cariyosipun inggih menika, rumiyin ing sawijining dinten wonten tabib ingkang nyuwun dhateng Pakualaman V supados saged nyamampakaken papan pemakaman kangge kulawarga Pakualaman kanthi papan wonten ing daerah Pakualaman. Pakualaman menika sarujuk ananging kanthi sarat lemah ingkang badhe dipunginakaken kangge makam menika sae. Konon cariyosipun, lemah calon makam Girigondo menika berbau arum wangi saengga komplek makam kasebut lajeng dipunsukani nama Girigondo. Giri ingkang tegesipun gunung saha gondo ingkang tegesipun arum utawi wangi. 

Wonten ing komplek pemakaman menika ugi dipunjangkepi kalih bangsal, papan kangge siram saha kamar alit. Lajeng wonten ing sisih ngandhap utawi pelataran saking makam menika dipunjangkepi ugi kaliyan mesjid, sumur, saha papan kangge parkir.

Para pangunjung ingkang pengin berziarah utawi kangge mlebet pemakaman Girigondo menika kanthi ancas berziarah utawi kangge objek panaliten, boten dipunkedahaken ngangge ageman khusus kados ta wonten ing papan pemakaman raja-raja ingkang wonten ing Imogiri. Peziarah menika namung cekap ngangge ageman ingkang limrah kemawon.