News Feature "Ngangkring Sareng Dekanat"

                                                                                                           

“Ngangkring Sareng Dekanat“

Selasa tanggal 24 September 2013 Badan Eksekutif Mahasiswa (BEM) Fakultas Bahasa dan Seni UNY nganakaken adicara “Ngangkring Sareng Dekanat”. Adicara menika kalaksanan wonten ing pendhapa tedjakusuma FBS UNY. Tema ingkang dipunusung inggih menika “Membedah Visi dan Misi Fakultas Bahasa dan Seni”.

Kagiatan ingkang dipunwiwiti tabuh pitu dalu menika dipunpangarsani dening Muhammad Subhan Putra. Wonten ugi dekan FBS, Prof. Dr. Zamzani, M.Pd. ingkang dipundampingi tiga wakil dekan FBS, inggih menika Dr. Widyastuti Purbani, M.A. (Wakil Dekan I), Sudarmadji, M.Pd. (Wakil Dekan II), saha Dr. Kun Setyaning Astuti, M. Pd (Wakil Dekan III) ingkang rawuh wonten ing agenda ingkang dipunadani kaliyan para mahasiswa. Sedaya reroncening adicara ingkang sampun samapta kalampahan kanthi lancar. Mliginipun adicara menika gadhahi ancas supados damel mahasiswa FBS mangertosi ancasipun fakultas saha dadosaken mahasiswa ingkang kritis bilih wonten ingkang nyimpang saking visi misi FBS. Sarta minangka kagiatan kagem nyambut mahasiswa enggal Fakultas Bahasa dan Seni angkatan 2013. Ngendikanipun mbak Sholihah Naili saking jurusan Bahasa dan Sastra Inggris minangka koordinator sie konsumsi adicara ngangkring sareng dekanat.

Ing dinten Selasa dalu menika kathah sanget ingkang ndherek adicara wonten ing pendhapa tedjakusuma. Katingal wonten maba bintang 2013 saha masyarakat Fakultas Bahasa dan Seni umumipun. Sedaya tiyang mirengaken dialog kanthi premati.

Adicara menika kagiatan ingkang dipunlampahi sepisan wonten ing setunggal tahun. Persiapan agenda menika sampun dipunwiwiti kirang langkung kalih wulan kepengker sakderengipun adicara menika kalampahan. Ananging amargi agenda sanesipun kayata wonten adicara OSPEK saha preinan syawalan lan ugi kathah sanget kagiatan ingkang badhe dipunlampahi. Dados persiapan pungkasanipun dipunlaksanakaken kalih minggu sakderengipun dinten Selasa menika.

Ingkang dados sorotan wonten ing adicara ngangkring sareng dekanat dinten kepengker inggih menika kawontenanipun warung angkringan ingkang wonten ing sisih leripun pendhapa tedjakusuma. Warungipun menika dipun desain pangenanipun kanthi sae, saengga saged ketingal tiyang kathah. Warung angkringan menika gratis kangge para mahasiswa ingkang dugi wonten ing adicara menika.

“Ngangkring Sareng Dekanat”  minangka salah satunggaling agenda saking Badan Eksekutif Mahasiswa (BEM). Kagiatan ing dinten kepengker kalampahan kanthi wujud nepangaken visi misi FBS langkung tebih kagem mahasiswa FBS, ingkang sampun rinonce wonten ing agenda semarak September. Tema ageng wonten ing semarak September kalawau inggih menika “Hamemayu Hayuning Bawana”.

“Hamamayu Hayuning Bawana”, saking tembung hamemayu (ayu) tegesipun ayu utawi dadosaken ayu. Hayuning menika kahanan, bawana tegesipun bumi. Bawana tegesipun donya (bumi), bawana menika gadhahi tigang jenis makna inggih menika: bawana alit tegesipun pribadi saha kulawarga: bawana agung tegesipun masyarakat, bangsa, saha negara: bawana langgeng tegesipun alam akhirat. Menawi makaten bilih dipundadosaken setunggal tegesipun dadosaken bumi menika ayu. Bumi wonten ing mriki gadhahi teges donya sak isinipun. Tema menika minangka falsafah, ancas, saha landasan gesang manungsa wonten ing jagad samenika. Falsafah menika dipuntepangaken dening Pujangga Ranggawarsita. Minangka falsafah saha ancasing pagesangan, memayu hayuning bawana nganjuraken supados manungsa gesang menika dipunginakaken kagem ningkataken kualitas hidup. Memayu hayuning bawana menika kadadeyan saking kalih bagian inggih menika memayu hayuning pribadi saha memayu hayuning bebrayan

Memayu hayuning pribadi inggih menika proses terus menerus ningkataken kualitas piyambakipun minangka dados manungsa (human quality). Bebrayan tegesipun pergaulan utawi interaksi antawisipun manungsa.

Keselaran menika saged kalampahan bilih wonten gayutan antawisipun tiyang gesang kaliyan Gusti ingkang akarya jagad. Ingkang wujudipun inggih menika tiyang gesang kedah sembahyang kaliyan Gusti Allah. Amargi Gusti menika sampun nyiptakaken jagad saha isinipun. Sedaya tindak tanduk gumantung kaliyan tiyang gesang menika kados pundi tanggung jawabipun gesang wonten ing alam donya sakmenika. Dados antawis tiyang gesang gadhahi gayutan kaliyan tiyang sanesipun saha kaliyan Gusti. Amargi kalih-kalihipun menika kedah seimbang supados sedaya pratingkah dasaripun ikhlas, saengga benjang boten nedahaken pamrih ingkang saged dadosaken perkawis.

Manungsa menika menawi sampun dugi wekdalipun kedah wangsul wonten ing pangayuning Pangeran, tegesipun “sakabehing dumadi yen wis tumekaning wates kodrate, mesti bakal mulih marang mula-mulanira lan sirna”. Menika kalawau kasil mbedhahing tema wonten ing adicara ngangkring sareng dekanat. Mugi-mugi tiyang gesang menika saged nindakaken sedaya tindak tanduk ingkang becik supados urip wonten ing alam dunya menika saged migunani saha barakallah.