Feature Bali "Budaya Atur Sesaji wonten ing Bali"

Budaya Atur Sesaji wonten ing Bali

Bali minangka propinsi ingkang sampun kondhang wonten ing negara manca. Boten kaget bilih kathah sanget para turis ingkang sami nelasaken dinten preinan menika kagem plesir ing provinsi ingkang dipunsebat ugi “Pulau Dewata”. Menapa dipunsebat “Pulau Dewata”? amargi wonten ing Bali menika kathah sanget patung saha arca-arca ingkang wonten ing saben griya saha pure.

Kaendahan wonten ing Bali menika nedahaken raos bungah kagem wisatawan ingkang dugi wonten ing papan wisata. Kathah sanget objek wisata ingkang wonten ing Bali menika, wiwit saking segara, museum-museum, saha pusat perbelanjaanipun. Para wisatawan lokal utawi manca remen sanget kaliyan budaya-budaya ingkang wonten ing Bali. Amargi saben budaya menika gadhahi makna ingkang dados daya tarikipun para wisatawan kalawau.

Tradisi saha budaya ingkang wonten ing Bali menika kenthel sanget, salah satunggaling budaya wonten ing mrika saben dintenipun kedah damel sesajen ingkang dipunpanggenaken wonten ing sakiwa tengenipun griya. Papan sesaji menika kadamel saking janur ingkang dipun bentuk arupi mangkok alit. Wujudipun panggenan sesaji menika wonten ingkang kotak, arupi sekar saha wajik. Wujudipun saged kapriksani saking gambar ing ngandhap.

   

  

Wosipun sesaji menika wonten sekar cacahipun sekawan. Sejatosipun sekar menika setunggal kemawon boten menapa-menapa, ananging menawi mekaten boten ketingal seninipun. Dados biasanipun sekar menika langkung sekedhik wonten tigang werni. Sekar menika boten dipuntemtoaken kedah menapa, ingkang wigatos sekaripun saged damel endahing sesaji. Sanesipun sekar, ugi wonten irisan ron pandhan, sekul sekedhik ingkang wonten ing nginggil sekul menika dipunsukani parutan klapa ingkang werni kuning. Ingkang pungkasan menika dipunsukani dhupa.

 

Sesaji ingkang sampun dados menika dipundongani rumiyin, sesampunipun dipundongani dipunkepyuki kaliyan toya suci. Saklajengipun nembe dipunparingaken wonten ing papan-paman tartamtu. Biasanipun wonten ing ngajeng griya, papan toya, pure, saha wonten ing kendaraan.

Maknanipun sesaji menika minangka sarana pandonga nyenyuwun marang para dewa supados dipunparingi keslametan gesangipun. Nglampahi saben kagiyatan saged lancar boten manggihi perkawis saha kalepatan-kalepatan.

Tiyang wonten ing Bali menika ugi asring ginakaken uwos ingkang tumempel wonten ing bathuk saha gulunipun. Uwos ingkang tumempel menika gadhahi makna ingkang wigatos. Uwos wonten ing bathuk gadhahi makna supados pikiran tiyang menika tetep suci kanthi ancas sedaya pamikiranipun sae. Lajeng uwos ingkang tumempel ing gulu gadhahi makna supados atinipun tiyang menika asring suci. Uwos menika sampun tumempel piyambak boten dipunparingi menapa-menapa, ananging tumempeling uwos menika dipunsebabaken pandonga ingkang sampun dipunaturaken dhumateng Gusti. Samangke uwos kalawau saged copot piyambak.